මහණෙනි, ඉතාමත් දුර බොහෝ දුර වූ තැන් සතරකි. ඒ කවර සතරක් ද යත්;
මහණෙනි, අහස ත් පොළොව ත් ය. මෙය ඉතාමත් දුර වූ බොහෝ දුර වූ පළමුවැන්න යි. මහණෙනි, සමුද්‍රයෙහි මෙතෙර ත් එතෙරත් ය. මෙය ඉතාමත් දුර වූ බොහෝ දුර වූ දෙවැන්න යි. මහණෙනි, යම් තැනකින් සූර්යයා නැග එයි ද, යම් තැනකින් සූර්යයා බැස යයි ද, මෙය ඉතාමත් දුර වූ බොහෝ දුර වූ තුන් වැන්න යි. මහණෙනි, සත්පුරුෂයන්ගේ ධර්මය ත් අසත්පුරුෂයන්ගේ ධර්මය ත් ය. මෙය ඉතාමත් දුර වූ බොහෝ දුර වූ සිව්වැන්න යි.
(ගාථා)
1. අහස ද දුර වෙයි. පොළොව ද දුර වෙයි. සමුද්‍රයෙහි යම් එතෙරක් ඇද්ද, එය ද ඉතා දුර යැයි කියනු ලැබේ. ආලෝකය ලබා දෙන සූර්යයා යම් තැනකින් උදාවෙයි ද, යම් තැනකින් අස්තයට යයි ද, ඒ අතර ද ඉතා දුර යැයි කියති.
2. සද්ධර්මය ත්, අසද්ධර්මය ත් අතර ඒකාන්තයෙන් ම එයට වඩා බොහෝ දුර යැයි කියති. සත්පුරුෂයන්ගේ එකතුව වෙන් නොවන ස්වභාවයෙන් ඇත්තේ ය. යම්තාක් සත්පුරුෂ ධර්මයේ සිටියි ද, එසේ ම සිටියි. අසත්පුරුෂ සමාගම වහා වෙන් ව යයි. එබැවින් සත්පුරුෂ ධර්මය අසත්පුරුෂයන්ගෙන් ඉතා ඈත් වූ දෙයකි.
සාදු! සාදු!! සාදු!!!
සුවිදූරවිදූර සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an2_4-1-5-7/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M