මහණෙනි, කරුණු සතරකින් යුක්ත වූ භික්ෂුවක් දන් පිළිගැනීම පිණිස සංඝයා යොමු කරයි ද, හේ ඔසොවා ගෙන පැමිණි බරක් බිම තබන අයුරින් නිරයෙහි උපදින්නේ ය. ඒ කවර කරුණු සතරකින් ද?
කැමැත්ත හේතුවෙන් අගතියට යයි. ද්වේෂය හේතුවෙන් අගතියට යයි. මුලාව හේතුවෙන් අගතියට යයි. භය හේතුවෙන් අගතියට යයි.
මහණෙනි, මේ කරුණු සතරින් යුක්ත වූ භික්ෂුවක් දන් පිළිගැනීම පිණිස සංඝයා යොමු කරයි ද, හේ ඔසොවා ගෙන පැමිණි බරක් බිම තබන අයුරින් නිරයෙහි උපදින්නේ ය.
මහණෙනි, කරුණු සතරකින් යුක්ත වූ භික්ෂුවක් දන් පිළිගැනීම පිණිස සංඝයා යොමු කරයි ද, හේ ඔසොවා ගෙන පැමිණි බරක් බිම තබන අයුරින් සුගතියෙහි උපදින්නේ ය. ඒ කවර කරුණු සතරකින් ද?
කැමැත්ත හේතුවෙන් අගතියට නොයයි. ද්වේෂය හේතුවෙන් අගතියට නොයයි. මුලාව හේතුවෙන් අගතියට නොයයි. භය හේතුවෙන් අගතියට නොයයි.
මහණෙනි, මේ කරුණු සතරින් යුක්ත වූ භික්ෂුවක් දන් පිළිගැනීම පිණිස සංඝයා යොමු කරයි ද, හේ ඔසොවා ගෙන පැමිණි බරක් බිම තබන අයුරින් සුගතියෙහි උපදින්නේ ය.
යම් ජනතාවක් කාමයෙහි අසංවර ව සිටිත් ද, අධාර්මික ව සිටිත් ද, ධර්ම ගෞරව නැතුව සිටිත් ද, කැමැත්තෙනුත්, ද්වේෂයෙනුත්, භයෙනුත්, අගතියට යත් ද, මෙබඳු පිරිස අතරෙහි සිටින මේ භත්තුද්දේසක තෙමේ පිරිස් කසටයෙක් යැයි කියනු ලැබේ. මෙසේ වදාරණ ලද්දේ සියල්ල දන්නා වූ තථාගත ශ්‍රමණයන් වහන්සේ විසිනි.
යම් ජනතාවක් ධර්මයෙහි සිටියාහු ද, පව් නොකරත් ද, කැමැත්තෙන් හෝ ද්වේෂයෙන් හෝ භයෙන් හෝ අගතියට නොයත් ද, එහෙයින් ඒ සත්පුරුෂයෝ පැසසිය යුත්තෝ ය. එබඳු පිරිස අතරෙහි සිටින භත්තුද්දේසක තෙමේ උතුම් තැනැත්තා යැයි කියනු ලැබේ. මෙසේ වදාරණ ලද්දේ සියල්ල දන්නා වූ තථාගත ශ්‍රමණයන් වහන්සේ විසිනි.
භත්තුද්දේසක සූත්‍රය නිමා විය.
දෙවෙනි චර වර්ගය අවසන් විය.
එහි පිළිවෙල උද්දානයයි :
චර සූත්‍රය, සීල සූත්‍රය, පධාන සූත්‍රය, සංවර සූත්‍රය, පඤ්ඤත්ති සූත්‍රය, සෝඛුම්ම සූත්‍රය, අගති සූත්‍ර තුන සහ භත්තුද්දේසක සූත්‍රය වශයෙන් මෙහි සූත්‍ර දශයෙකි.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an2_4-1-2-10/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M