මා විසින් මෙසේ අසන ලදී. එක් සමයක භාග්‍යවතුන් වහන්සේ වජ්ජී ජනපදයෙහි භණ්ඩ නම් ගමෙහි වැඩ වසන සේක. එකල්හී භාග්‍යවතුන් වහන්සේ “මහණෙනි” යි කියා භික්ෂූන් අමතා වදාළ සේක. “පින්වතුන් වහන්සැ”යි ඒ භික්ෂූහු භාග්‍යවතුන් වහන්සේට පිළිවදන් දුන්හ. භාග්‍යවතුන් වහන්සේ මෙය වදාළ සේක.
“මහණෙනි, මේ සා අතිදීර්ඝ කාලයක් මුළුල්ලෙහි භවයෙන් භවයට ඉපදෙමින් මැරෙමින් ඔබට ත්, මට ත් සැරිසරා යන්නට සිදුවූයේ සතර ධර්මයක් අවබෝධ නොකිරීම නිසා ය. නුවණින් ප්‍රත්‍යක්ෂ නොකිරීම නිසා ය. ඒ කවර සතර ධර්මයක් ද යත්;
මහණෙනි, ආර්ය වූ සීලය අවබෝධ නොකිරීම නිසා ය, නුවණින් ප්‍රත්‍යක්ෂ නොකිරීම නිසා ය, මේ සා අතිදීර්ඝ කාලයක් මුළුල්ලෙහි භවයෙන් භවයට ඉපදෙමින් මැරෙමින් ඔබට ත්, මට ත් සැරිසරා යන්නට සිදුවූයේ.
මහණෙනි, ආර්ය වූ සමාධිය අවබෝධ නොකිරීම නිසා ය, නුවණින් ප්‍රත්‍යක්ෂ නොකිරීම නිසා ය, මේ සා අතිදීර්ඝ කාලයක් මුළුල්ලෙහි භවයෙන් භවයට ඉපදෙමින් මැරෙමින් ඔබට ත්, මට ත් සැරිසරා යන්නට සිදුවූයේ.
මහණෙනි, ආර්ය වූ ප්‍රඥාව අවබෝධ නොකිරීම නිසා ය, නුවණින් ප්‍රත්‍යක්ෂ නොකිරීම නිසා ය, මේ සා අතිදීර්ඝ කාලයක් මුළුල්ලෙහි භවයෙන් භවයට ඉපදෙමින් මැරෙමින් ඔබට ත්, මට ත් සැරිසරා යන්නට සිදුවූයේ.
මහණෙනි, ආර්ය වූ විමුක්තිය අවබෝධ නොකිරීම නිසා ය, නුවණින් ප්‍රත්‍යක්ෂ නොකිරීම නිසා ය, මේ සා අතිදීර්ඝ කාලයක් මුළුල්ලෙහි භවයෙන් භවයට ඉපදෙමින් මැරෙමින් ඔබට ත්, මට ත් සැරිසරා යන්නට සිදුවූයේ.
මහණෙනි, ඒ ආර්ය වූ සීලය අවබෝධ කරගන්නට ත්, නුවණින් ප්‍රත්‍යක්ෂ කරගන්නට ත් පුළුවන් විය. ආර්ය වූ සමාධිය අවබෝධ කරගන්නට ත්, නුවණින් ප්‍රත්‍යක්ෂ කරගන්නට ත් පුළුවන් විය. ආර්ය වූ ප්‍රඥාව අවබෝධ කරගන්නට ත්, නුවණින් ප්‍රත්‍යක්ෂ කරගන්නට ත් පුළුවන් විය. ආර්ය වූ විමුක්තිය අවබෝධ කරගන්නට ත්, නුවණින් ප්‍රත්‍යක්ෂ කරගන්නට ත් පුළුවන් විය. භව තෘෂ්ණාව සිඳින ලද්දේ ය. භව රැහැන ක්ෂය වී ගියේ ය. දැන් අපට පුනර්භවයක් නැත්තේ ය.
භාග්‍යවතුන් වහන්සේ මෙය වදාළ සේක. මෙය වදාළ ශාස්තෘ වූ සුගතයන් වහන්සේ යළි ත් මෙය ද වදාළ සේක.
සීලය ත්, සමාධිය ත්, ප්‍රඥාව ත්, අනුත්තර වූ විමුක්තිය ත් යන මේ ආර්ය වූ ධර්මයන් විසිර ගිය යස ඝෝෂා ඇති ගෞතමයන් වහන්සේ විසින් අවබෝධ කරන ලදී.
මෙසේ බුදුරජාණන් වහන්සේ විශිෂ්ට වූ ඥානයෙන් පසක් කොට භික්ෂූන් හට ධර්මය දෙසූ සේක. සසර දුක් නිමාවට පත් කළ, සදහම් ඇස් ඇති ශාස්තෘන් වහන්සේ මුළුමනින් ම නිවීමට පත් වූ සේක.
අනුබුද්ධ සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an2_4-1-1-1/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M