පින්වත් මහණෙනි, ලෝකයෙහි පුද්ගලයෝ තුන් දෙනෙක් දකින්නට ලැබෙනවා. ඒ තුන් දෙනා කවුද? ගලේ කෙටූ ඉරක් බඳු වූ පාසාණලේඛූපම පුද්ගලයා, පොළොවේ ඇඳි ඉරක් බඳු වූ පඨවිලේඛූපම පුද්ගලයා හා ජලයෙහි ඇඳි ඉරක් බඳු වූ උදකලේඛූපම පුද්ගලයායි.
පින්වත් මහණෙනි, ගලේ කෙටූ ඉරක් බඳු වූ පාසාණලේඛූපම පුද්ගලයා යනු කවුද?
පින්වත් මහණෙනි, මෙහිලා ඇතැම් පුද්ගලයෙක් නිතරම කිපෙනවා. ඔහුගේ ඒ ක්‍රෝධය බොහෝ කාලයක් චිත්තාභ්‍යන්තරයෙහි පවතිනවා. පින්වත් මහණෙනි, ඒක හරියට ගලේ කෙටූ ඉරක් වගෙයි. එය සුළඟින්වත්, ජලයෙන්වත් ඉක්මනින් නැතිවෙලා යන්නේ නෑ. බෙහෝ කල් පවතිනවා. ඒ වගේම තමයි පින්වත් මහණෙනි, මෙහි ඇතැම් පුද්ගලයෙක් නිතරම කිපෙනවා. ඔහුගේ ඒ ක්‍රෝධය බොහෝ කාලයක් චිත්තාභ්‍යන්තරයෙහි පවතිනවා. පින්වත් මහණෙනි, මොහුට තමයි ගලේ කෙටූ ඉරක් බඳු වූ පාසාණලේඛූපම පුද්ගලයා කියන්නේ.
පින්වත් මහණෙනි, පොළොවේ ඇඳි ඉරක් බඳු වූ පඨවිලේඛූපම පුද්ගලයා යනු කවුද?
පින්වත් මහණෙනි, මෙහිලා ඇතැම් පුද්ගලයෙක් නිතරම කිපෙනවා. ඔහුගේ ඒ ක්‍රෝධය බොහෝ කාලයක් චිත්තාභ්‍යන්තරයෙහි පවතින්නේ නෑ. පින්වත් මහණෙනි, ඒක හරියට පොළොවේ ඇඳි ඉරක් වගෙයි. එය සුළඟින් හෝ ජලයෙන් හෝ ඉක්මනින් නැතිවෙලා යනවා. බෙහෝ කල් පවතින්නේ නෑ. ඒ වගේම තමයි පින්වත් මහණෙනි, මෙහි ඇතැම් පුද්ගලයෙක් නිතරම කිපෙනවා. ඔහුගේ ඒ ක්‍රෝධය බොහෝ කාලයක් චිත්තාභ්‍යන්තරයෙහි පවතින්නේ නෑ. පින්වත් මහණෙනි, මොහුට තමයි පොළොවේ ඇඳි ඉරක් බඳු වූ පඨවිලේඛූපම පුද්ගලයා කියන්නේ.
පින්වත් මහණෙනි, ජලයෙහි ඇඳි ඉරක් බඳු වූ උදකලේඛූපම පුද්ගලයා යනු කවුද?
පින්වත් මහණෙනි, මෙහිලා ඇතැම් පුද්ගලයෙක් තදින් කියන කොටත්, සැරෙන් කියන කොටත්, අමනාපයෙන් කියන කොටත් එය ගණන් නොගෙන කවුරු සමඟත් පෑහිලාම යනවා. සැසඳිලා යනවා. සතුටටම පත්වෙනවා. පින්වත් මහණෙනි, ඒක හරියට දියෙහි ඇඳි ඉරක් වගෙයි. වහාම මැකිල යනවා. බොහෝ කල් පවතින්නේ නෑ. අන්න ඒ වගේම තමයි පින්වත් මහණෙනි, මෙහි ඇතැම් පුද්ගලයෙක් තදින් කියන කොටත්, සැරෙන් කියන කොටත්, අමනාපයෙන් කියන කොටත් එය ගණන් නොගෙන කවුරු සමඟත් පෑහිලාම යනවා. සැසඳිලා යනවා. සතුටටම පත්වෙනවා. පින්වත් මහණෙනි, මොහුට තමයි ජලයෙහි ඇඳි ඉරක් බඳු වූ උදකලේඛූපම පුද්ගලයා කියන්නේ.
පින්වත් මහණෙනි, ලෝකයෙහි දකින්නට ලැබෙන්නේ මේ පුද්ගලයන් තුන් දෙනා තමයි.
තුන්වෙනි භරණ්ඩු වර්ගයයි.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an1_3-3-3-10/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M