45. පින්වත් මහණෙනි, මේ පිරිස් තුනක් ඉන්නවා. ඒ තුන මොනවාද? අග්ගවතී පිරිස, වග්ග පිරිස, සමග්ග පිරිස.
පින්වත් මහණෙනි, අග්ගවතී පිරිස කවුද?
පින්වත් මහණෙනි, මෙහි යම් පිරිසක් තුළ ස්ථවිර භික්ෂූන් වහන්සේලා ඉන්නවා. බහුභාණ්ඩික නෑ. ශාසනය හෑල්ලුකොට ගන්නේ නෑ. නීවරණවලින් බැහැරව ඉන්නවා. හුදෙකලා විවේකය පෙරටු කරගෙන ඉන්නවා. නොපැමිණි මාර්ගඵලාවබෝධයකට පැමිණීම පිණිස, අවබෝධ නොකළ මාර්ගඵල ආදිය අවබෝධ කිරීම පිණිස, සාක්ෂාත් නොකළ මාර්ගඵල ආදිය සාක්ෂාත් කිරීම පිණිස, වීරිය පවත්වනවා. ඔවුන්ගේ අනුගාමික පිරිසත් ඒ අදහස්වලටම අනුව හැඩගැසෙනවා. ඔවුනුත් බහුභාණ්ඩික වෙන්නේ නෑ. ශාසනය හෑල්ලුකොට ගන්නේ නෑ. නීවරණවලින් බැහැරව ඉන්නවා. හුදෙකලා විවේකය පෙරටු කරගෙන ඉන්නවා. නොපැමිණි මාර්ගඵලාවබෝධයකට පැමිණීම පිණිස, අවබෝධ නොකළ මාර්ගඵල ආදිය අවබෝධ කිරීම පිණිස, සාක්ෂාත් නොකළ මාර්ගඵල ආදිය සාක්ෂාත් කිරීම පිණිස, වීරිය පවත්වනවා. පින්වත් මහණෙනි, මේ පිරිසට තමයි කියන්නේ අග්ගවතී පිරිස කියලා.
පින්වත් මහණෙනි, වග්ග පිරිස කවුද?
පින්වත් මහණෙනි, මෙහි යම් පිරිසක භික්ෂූන් හටගත් රණ්ඩු ඇතිව, හටගත් කෝලාහල ඇතිව, වාදවිවාද කරමින්, එකිනෙකාට වචන නැමැති අඩියටිවලින් පහර දෙමින් වාසය කරනවා. පින්වත් මහණෙනි, මේ පිරිසට තමයි කියන්නේ වග්ග පිරිස කියලා.
පින්වත් මහණෙනි, සමග්ග පිරිස කවුද?
පින්වත් මහණෙනි, මෙහි යම් පිරිසක භික්ෂූන් සමඟියෙන්, සතුටින්, වාදවිවාද නොකරගනිමින්, කිරියි දියයි සේ පෑහෙමින් එකිනෙකාට ප්‍රියමනාප වූ ඇසින් දකිමින් වාසය කරනවා. පින්වත් මහණෙනි, මේ පිරිසට තමයි සමග්ග පිරිස කියල කියන්නේ.
පින්වත් මහණෙනි, යම් විටෙක භික්ෂූන් සමඟිව, සතුටින්, වාදවිවාද නොකරමින්, කිරියි දියයි මෙන් පෑහෙමින්, එකිනෙකාට ප්‍රිය ඇසින් දකිමින් වාසය කරනවා නම්, පින්වත් මහණෙනි, එතකොට ඒ භික්ෂූන් බොහෝ පින් රැස්කරගන්නවා. එතකොට පින්වත් මහණෙනි, ඒ භික්ෂූන් මේ මුදිතා චේතෝ විමුක්තිය නැමැති බ්‍රහ්ම විහරණයෙන් තමයි වාසය කරන්නේ. ප්‍රමුදිත කෙනාට ප්‍රීතිය උපදිනවා. ප්‍රීතිමත් සිතකින් ඉන්න කෙනාගේ කය සංසිඳෙනවා. සංසිඳී ගිය කයක් ඇති කෙනා සැප විඳිනවා. සුවපත් වූ කෙනාගේ සිත සමාධියට පත්වෙනවා.
පින්වත් මහණෙනි, ඒක මේ වගේ දෙයක්. පර්වතයක් මුදුනට ලොකු වැහි බිංදු සහිතව වැස්සක් වහිනවා. එතකොට ඒ ජලය පහළට ගලාගෙන ඇවිදින් පර්වතයේ තියෙන විවරයන්, කානු ඔස්සේ ගලාගෙන ඇවිත්, කුඩා දියපහරවල් පිරී යනවා. ඒ කුඩා දියපහරවල් පිරී යාමෙන්, කුඩා ජලාශ පිරී යනවා. කුඩා ජලාශ පිරී යාමෙන්, මහා ජලාශ පිරී යනවා. මහා ජලාශ පිරී යාමෙන් කුඩා නදී පිරී යනවා. කුඩා නදී පිරී යාමෙන්, මහා නදී පිරෙනවා. මහා නදී පිරී යාමෙන්, මහා සමුද්‍රය පිරී යනවා. පින්වත් මහණෙනි, ඒ අයුරින්ම යම් විටෙක භික්ෂූන් සමඟිව, සතුටින්, වාදවිවාද නොකරමින්, කිරියි දියයි මෙන් පෑහෙමින්, එකිනෙකාට ප්‍රිය ඇසින් දකිමින් වාසය කරනවා නම්, පින්වත් මහණෙනි, එතකොට ඒ භික්ෂූන් බොහෝ පින් රැස්කරගන්නවා. එතකොට පින්වත් මහණෙනි, ඒ භික්ෂූන් මේ මුදිතා චේතෝ විමුක්තිය නැමැති බ්‍රහ්ම විහරණයෙන් තමයි වාසය කරන්නේ. ප්‍රමුදිත කෙනාට ප්‍රීතිය උපදිනවා. ප්‍රීතිමත් සිතකින් ඉන්න කෙනාගේ කය සංසිඳෙනවා. සංසිඳී ගිය කයක් ඇති කෙනා සැප විඳිනවා. සුවපත් වූ කෙනාගේ සිත සමාධියට පත්වෙනවා. පින්වත් මහණෙනි, මේ තමයි පිරිස් තුන.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an1_3-2-5-4/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M