පින්වත් මහණෙනි, අංග තුනකින් සමන්විත වූ මහහොරා ගෙවල් දොරවල් කඩනවා. මංකොල්ල කනවා. එක ගෙයකුත් හොරකම් කරනවා. මග රැකගෙනත් ඉන්නවා. කවර අංග තුනකින්ද? පින්වත් මහණෙනි, මෙහි හොරා විසම තැන් ඇසුරු කරගෙන ඉන්නවා. කැලෑ ඇසුරු කරගෙන ඉන්නවා. බලවත් අය ඇසුරු කරගෙන ඉන්නවා. පින්වත් මහණෙනි, මහහොරා විසම තැන ඇසුරු කරගෙන ඉන්නේ කොහොමද? පින්වත් මහණෙනි, මෙහි මහහොරා ගංගා දුර්ග වේවා, විසම පර්වත වේවා ඇසුරු කරගෙන ඉන්නවා. පින්වත් මහණෙනි, මෙන්න මේ විදිහටයි මහහොරා විසම තැන් ඇසුරු කරන කෙනෙක් වෙන්නේ.
පින්වත් මහණෙනි, කොහොමද මහහොරා කැලෑව ඇසුරු කරගෙන ඉන්නේ? පින්වත් මහණෙනි, මෙහි මහහොරා තණ ලැහැබක් හෝ මහගස් තියෙන රුක් ලැහැබක් හෝ ගල් ගුහාවක් හෝ වන ලැහැබක් හෝ ඇසුරු කරගෙන ඉන්නවා. පින්වත් මහණෙනි, මෙන්න මේ විදිහට මහහොරා කැලෑව ඇසුරු කරගෙන ඉන්නවා.
පින්වත් මහණෙනි, කොහොමද මහ හොරා බලවත් අය ඇසුරු කරගෙන ඉන්නේ? පින්වත් මහණෙනි, මෙහි මහ හොරා රජවරු හෝ රජ්ජුරුවන්ගේ මහා ඇමතිවරු හෝ ඇසුරු කරගෙන ඉන්නවා. එතකොට ඔහුට මේ විදිහට හිතෙනවා. ‘ඉතින් කවුරු හරි මං ගැන මොනවා හරි කියනවා නම්, රජවරු හෝ රජ්ජුරුවන්ගේ මහා ඇමැතිවරු හෝ මාව ආරක්ෂා වෙන විදිහට කතා කරාවි’ ඉතින් කවුරු හරි ඔහුට මොනවා හරි කිව්වොත්, ඒ රජවරු හෝ රජ මහා ඇමතිවරු හෝ ඔහුව ආරක්ෂා කරගන්න කතා කරනවා. පින්වත් මහණෙනි, ඒ විදිහට මහ හොරා බලවත් අය ඇසුරු කරගෙන ඉන්න කෙනෙක් වෙනවා. පින්වත් මහණෙනි, මේ අංග තුනෙන් යුතු මහ හොරා ගෙවල් දොරවල් කඩනවා. මංකොල්ල කනවා. එක ගෙයකුත් හොරකම් කරනවා. මග රැකගෙනත් ඉන්නවා.
අන්න ඒ වගේම තමයි පින්වත් මහණෙනි, කාරණා තුනකින් යුතු පවිටු භික්ෂුව සාරා දමන ලද ගුණ ඇතිව, නැසී ගිය ගුණ ඇතිව ජීවිතය පරිහරණය කරනවා. වැරදි සහගතවත් ඉඳගෙන නුවණැත්තන්ගේ ගැරහීමටත් ලක්වෙනවා. බොහෝ පවුත් රැස්කරනවා. කවර කාරණා තුනකින්ද? පින්වත් මහණෙනි, මෙහි පවිටු භික්ෂුව විසම තැන් ඇසුරු කරනවා. කැලේ ඇසුරු කරගෙන ඉන්නවා. බලවත් අය ඇසුරු කරගෙන ඉන්නවා.
පින්වත් මහණෙනි, කොහොමද පාපී භික්ෂුව විසම තැන් ඇසුරු කරන්නේ? පින්වත් මහණෙනි, පාපී භික්ෂුව පවිටු වූ කාය කර්මයෙන් යුක්තයි. පවිටු වූ වචී කර්මයෙන් යුක්තයි. පවිටු වූ මනෝ කර්මයෙන් යුක්තයි. පින්වත් මහණෙනි, මේ විදිහට පාපී භික්ෂුව විසම තැන් ඇසුරු කරන කෙනෙක් වෙනවා.
පින්වත් මහණෙනි, කොයි විදිහටද පාපී භික්ෂුව කැලය ඇසුරු කරගෙන ඉන්නේ? පින්වත් මහණෙනි, මෙහි පාපී භික්ෂුව මිත්‍යාදෘෂ්ටිකයි. දැඩි ලෙස ග්‍රහණය කරගත් මිත්‍යාදෘෂ්ටියෙන් යුක්තයි. පින්වත් මහණෙනි, මේ විදිහට පාපී භික්ෂුව කැලය ඇසුරු කරගෙන ඉන්නවා.
පින්වත් මහණෙනි, කොහොමද පාපී භික්ෂුව බලවත් අය ඇසුරු කරගෙන ඉන්නේ? පින්වත් මහණෙනි, මෙහි පාපී භික්ෂුව රජවරු හෝ රජ්ජුරුවන්ගේ මහා ඇමතිවරු හෝ ඇසුරු කරගෙන ඉන්නවා. එතකොට ඔහුට මේ විදිහට හිතෙනවා. ‘ඉතින් කවුරු හරි මං ගැන මොනවා හරි කියනවා නම්, රජවරු හෝ රජ්ජුරුවන්ගේ මහා ඇමැතිවරු හෝ මාව ආරක්ෂා වෙන විදිහට කතා කරාවි’ ඉතින් කවුරු හරි ඔහුට මොනවා හරි කිව්වොත්, ඒ රජවරු හෝ රජ මහා ඇමතිවරු හෝ ඔහුව ආරක්ෂා කරගන්න කතා කරනවා. පින්වත් මහණෙනි, ඒ විදිහට පාපී භික්ෂුව බලවත් අය ඇසුරු කරගෙන ඉන්න කෙනෙක් වෙනවා. පින්වත් මහණෙනි, මේ කාරණා තුනෙන් යුතු පාපී භික්ෂුව සාරා දමන ලද ගුණ ඇතිව, නැසී ගිය ගුණ ඇතිව ජීවිතය පරිහරණය කරනවා. වැරදි සහගතවත් ඉඳගෙන නුවණැත්තන්ගේ ගැරහීමටත් ලක්වෙනවා. බොහෝ පවුත් රැස්කරනවා.
පස්වෙනි චූල වර්ගයයි.
පළමුවෙනි සූත්‍ර දේශනා පණහ නිමාවිය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an1_3-1-5-11/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M