පින්වත් මහණෙනි, අඩමාසයක අටවකදා සතරවරම් මහ රජවරුන්ගේ පිරිසට අයත් ඇමැතිවරු මේ ලෝකය සිසාරා ඇවිද යනවා. “කිම? මේ මනුෂ්‍යයින් අතර බොහෝ මිනිසුන් මවට සළකනවාද? පියාට සළකනවාද? ශ්‍රමණයින්ට සළකනවාද? බ්‍රාහ්මණයින්ට සළකනවාද? පවුලේ වැඩිමහළු අයට ගරු බුහුමන් කරනවාද? උපෝසථ සීලය සමාදන් වෙනවාද? සිහි නුවණ වඩනවාද? පින් කරනවාද?” කියලා.
පින්වත් මහණෙනි, අඩමාසයක තුදුස්වකදා සතරවරම් මහ රජවරුන්ගේ පුත්‍රයෝ මේ ලෝකය සිසාරා ඇවිද යනවා. “කිම? මේ මනුෂ්‍යයින් අතර බොහෝ මිනිසුන් මවට සළකනවාද? පියාට සළකනවාද? ශ්‍රමණයින්ට සළකනවාද? බ්‍රාහ්මණයින්ට සළකනවාද? පවුලේ වැඩිමහළු අයට ගරු බුහුමන් කරනවාද? උපෝසථ සීලය සමාදන් වෙනවාද? සිහි නුවණ වඩනවාද? පින් කරනවාද?” කියලා.
පින්වත් මහණෙනි, පුරපසළොස්වක් පොහෝදා සතරවරම් මහ රජවරුන් තමන්ම මේ ලෝකය සිසාරා ඇවිද යනවා. “කිම? මේ මනුෂ්‍යයින් අතර බොහෝ මිනිසුන් මවට සළකනවාද? පියාට සළකනවාද? ශ්‍රමණයින්ට සළකනවාද? බ්‍රාහ්මණයින්ට සළකනවාද? පවුලේ වැඩිමහළු අයට ගරු බුහුමන් කරනවාද? උපෝසථ සීලය සමාදන් වෙනවාද? සිහි නුවණ වඩනවාද? පින් කරනවාද?” කියලා.
පින්වත් මහණෙනි, ඉදින් මිනිසුන් අතර මවට සළකන, පියාට සළකන, ශ්‍රමණයන්ට සළකන, බ්‍රාහ්මණයන්ට සළකන, කුලදෙටුවන් පුදන, උපෝසථ සිල් රකින, සිහිය නුවණ වඩන, පින් දහම් කරන මනුෂ්‍යයන් සිටින්නේ ටික දෙනෙක් නම්, එතකොට පින්වත් මහණෙනි, සතරවරම් මහරජවරු සුධර්මා නම් දිව්‍ය සභාවේ රැස්ව සිටින්නා වූ තව්තිසාවැසි දෙවියන්හට දැනුම් දෙනවා, “නිදුකාණෙනි, මිනිසුන් අතර මවට සළකන, පියාට සළකන, ශ්‍රමණයන්ට සළකන, බ්‍රාහ්මණයන්ට සළකන, කුලදෙටුවන් පුදන, උපෝසථ සිල් රකින, සිහිය නුවණ වඩන, පින් දහම් කරන මනුෂ්‍යයන් සිටින්නේ ටික දෙනයි.” පින්වත් මහණෙනි, ඒ කාරණයෙන් තව්තිසාවැසි දෙවිවරු නොසතුටට පත් වෙනවා. “අහෝ භවත්නි, දිව්‍ය පිරිස අඩුවෙලා යාවි නෙව. අසුර පිරිස් වැඩිවෙලා යාවි නෙව” කියලා.
පින්වත් මහණෙනි, ඉදින් මිනිසුන් අතර මවට සළකන, පියාට සළකන, ශ්‍රමණයන්ට සළකන, බ්‍රාහ්මණයන්ට සළකන, කුලදෙටුවන් පුදන, උපෝසථ සිල් රකින, සිහිය නුවණ වඩන, පින් දහම් කරන මනුෂ්‍යයන් සිටින්නේ බොහෝ දෙනෙක් නම්, එතකොට පින්වත් මහණෙනි, සතරවරම් මහරජවරු සුධර්මා නම් දිව්‍ය සභාවේ රැස්ව සිටින්නා වූ තව්තිසාවැසි දෙවියන්හට දැනුම් දෙනවා, “නිදුකාණෙනි, මිනිසුන් අතර මවට සළකන, පියාට සළකන, ශ්‍රමණයන්ට සළකන, බ්‍රාහ්මණයන්ට සළකන, කුලදෙටුවන් පුදන, උපෝසථ සිල් රකින, සිහිය නුවණ වඩන, පින් දහම් කරන මනුෂ්‍යයන් බොහෝ දෙනෙක් ඉන්නවා.” පින්වත් මහණෙනි, ඒ කාරණයෙන් තව්තිසාවැසි දෙවිවරු සතුටට පත්වෙනවා. “භවත්නි, සැබැවින්ම දිව්‍ය පිරිස වැඩිවෙලා යාවි. අසුර පිරිස් අඩුවෙලා යාවි” කියලා.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an1_3-1-4-7/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M