පින්වත් මහණෙනි, මේ පුද්ගලයින් තුන් දෙනෙක් පුද්ගලයෙකුට බොහෝ උපකාර යි. ඒ තුන් දෙනා කවුද? පින්වත් මහණෙනි, යම් පුද්ගලයෙකු කරා පැමිණ, ඔහු නිසා යම් පුද්ගලයෙක් බුදුන් සරණ ගියා නම්, දහම් සරණ ගියා නම්, සඟුන් සරණ ගියා නම්, පින්වත් මහණෙනි, මේ පුද්ගලයා තමයි අර පැමිණි පුද්ගලයාට බොහෝ උපකාර වූ කෙනා.
ඒ ගැන තවදුරටත් කියනවා නම් පින්වත් මහණෙනි, යම් පුද්ගලයෙකු කරා පැමිණ, ඔහු නිසා යම් පුද්ගලයෙක් ‘මෙය වනාහී දුක නම් වූ ආර්ය සත්‍යය යි’ කියා ඇති සැටියෙන් ම අවබෝධ කරනවා නම්, ‘මෙය වනාහී දුකේ හටගැනීම නම් වූ ආර්ය සත්‍යය යි’ කියා ඇති සැටියෙන් ම අවබෝධ කරනවා නම්, ‘මෙය වනාහී දුක නැති වීම නම් වූ ආර්ය සත්‍යය යි’ කියා ඇති සැටියෙන් ම අවබෝධ කරනවා නම්, ‘මෙය වනාහී දුක් නැති වීම පිණිස පවතින ප්‍රතිපදාව නම් වූ ආර්ය සත්‍යය යි’ කියා ඇති සැටියෙන් ම අවබෝධ කරනවා නම්, පින්වත් මහණෙනි, මේ පුද්ගලයා තමයි අර පැමිණි පුද්ගලයාට බොහෝ උපකාර වූ කෙනා.
ඒ ගැන තවදුරටත් කියනවා නම් පින්වත් මහණෙනි, යම් පුද්ගලයෙකු කරා පැමිණ, ඔහු නිසා යම් පුද්ගලයෙක් ආශ්‍රව ක්ෂය කිරීමෙන්, ආශ්‍රව රහිත වූ චේතෝ විමුක්තියත්, ප්‍රඥා විමුක්තියත් මේ ජීවිතයේ දී ම තමන් විසින් ම සාක්ෂාත් කොට වාසය කරනවා නම්, පින්වත් මහණෙනි, මේ පුද්ගලයා තමයි අර පැමිණි පුද්ගලයාට බොහෝ උපකාර වූ කෙනා. පින්වත් මහණෙනි, මේ තමයි පුද්ගලයෙකුට බොහෝ උපකාර වන පුද්ගලයන් තුන් දෙනා.
පින්වත් මහණෙනි, මේ පුද්ගලයන් තුන් දෙනාට වඩා බොහෝ උපකාර ඇති වෙනත් පුද්ගලයෙක් අර පුද්ගලයාට නැහැ කියල යි මා කියන්නේ. පින්වත් මහණෙනි, මේ පුද්ගලයන් තුන් දෙනාට අර පුද්ගලයා විසින් වන්දනා කිරීම්, දැක හුනස්නෙන් නැගී සිටීම, දෑත් එක් කොට ඇඳිලි බැඳීමෙන්, යහපත් අයුරු දැක්වීමෙන්, සිවුරු, පිණ්ඩපාත, සේනාසන, බෙහෙත් පිරිකර ආදිය පූජා කිරීමෙන් ඒ කළ උපකාරයට පෙරලා උපකාර කිරීම පහසු දෙයක් යැයි මම නො කියමි.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an1_3-1-3-4/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M