(ඝටීකාර දෙවියා) :
“භික්‍ෂුන් වහන්සේලා හත්නමක් හිටියා. උන්වහන්සේලා රාග, ද්වේෂ නැතිකරලා, ජීවිතේ නම් වූ ලෝකය කෙරෙහි තිබුණු තෘෂ්ණාවෙන් එතෙර වෙලා, විමුක්ති සිත් ඇතිව අවිහ බඹලොව උපන්නා.
එතෙර වෙන්න ඉතාම දුෂ්කර වූ, මේ කෙලෙස් සහිත මාර විජිතයෙන් එතෙර වුනේ කවුද? මිනිස් දේහය අත්හැරලා දැම්මට පස්සෙ ලැබිච්ච දිව්‍ය බන්ධනත් ඉක්මවා ගියේ කවුද?
උපක, පලගණ්ඩ, පුක්කුසාති යන තුන්දෙනාත්, භද්දිය, භද්දදේව, බාහුදන්ති, පිංගිය යන හතරදෙනාත්, මනුස්ස දේහය අත්හැරියට පස්සේ ලැබිච්ච දිව්‍ය බන්ධනත් ඉක්මවා ගියා.”
(භාග්‍යවතුන් වහන්සේ) :
“මාරයාගේ බන්ධනයෙන් නිදහස් වෙච්ච, ඔවුන්ගේ දක්‍ෂකම ගැන ඔබ ප්‍රශංසා කරනවා නේද? ඔය සංසාර බන්ධනය ඔවුන් සිඳ දැම්මෙ කාගෙ ධර්මයක් අවබෝධ කරගෙනද?”
(ඝටීකාර දෙවියා) :
“භාග්‍යවතුන් වහන්සේගෙන් තොරව නොවෙයි. භාග්‍යවතුන් වහන්සේගේ ශාසනයෙන් බැහැරවත් නොවෙයි. භාග්‍යවතුන් වහන්සේ වදාළ ධර්මය අවබෝධ කරලයි ඔවුන් මේ භව බන්ධනය සිඳ දැම්මේ.
යම් නිවනක නාමරූප ඉතිරි නැතිව නිරුද්ධ වේ නම්, ඔවුන් ඒ නිවන මේ ශාසනයේදීම අවබෝධ කරලයි භවබන්ධන සිඳ දැම්මෙ.”
(භාග්‍යවතුන් වහන්සේ) :
“අවබෝධයට දුෂ්කර වූ, දැනගැනීමට දුෂ්කර වූ, අතිශයෙන් ගම්භීර වචන නෙව කියන්නෙ. ඔබ කවරෙකුගේ ධර්මයක් දැනගෙනද ඔවැනි ගාම්භීර වචන කියන්නේ?”
(ඝටීකාර දෙවියා) :
“ඉස්සර මම වේහලිංග කියන ගමේ ඝටීකාර කියන කුඹල්කරුවා. මං අම්මා තාත්තට හොඳට සැළකුවා. මං කාශ්‍යප බුදුරජාණන් වහන්සේගේ උපාසක කෙනෙක්.
මං මෛථුන සේවනයෙන් සම්පූර්ණයෙන්ම වෙන්වෙලයි හිටියේ. මං කාමයන් රහිත බ්‍රහ්මචාරීව හිටියා. ඒ කාලෙ ඔබවහන්සේයි, මමයි එකම ගමෙයි හිටියේ. ඒ කාලෙ මම තමයි ඔබවහන්සේගේ හොඳම යාළුවා.
ඉතින් මම විමුක්තියට පත්වුන, රාග, ද්වේෂ, නැතිකළ, තෘෂ්ණාවෙන් එතෙර වුන ඒ භික්‍ෂුන් වහන්සේලා සත් නම ගැන දන්නවා.”
(භාග්‍යවතුන් වහන්සේ) :
“පින්වත් භාර්ගව, දැන් ඔබ කියූ කරුණු එහෙමම තමයි. ඉස්සර වේහලිංග කියන ගමේ ඝටීකාර කියල කුඹල්කරුවෙක් හිටියා තමයි. එයා මව්පියන්ට උපස්ථාන කළා. කාශ්‍යප බුදුරජාණන් වහන්සේගේ උපාසක කෙනෙක්.
එයා මෛථුන්‍යයෙන් වෙන් වෙලා තමයි හිටියේ. කාමයෙන් තොරව, බ්‍රහ්මචාරීව හිටපු කෙනෙක්. මාත් එක්ක එක ගමේ තමයි හිටියේ. ඉස්සර මගේ යාළුවෙක් තමයි.”
(ධර්ම සංගායනාව කළ රහතන් වහන්සේලා) :
“ඔන්න ඔය විදිහටයි පරණ යාළුවො දෙන්න මුණගැහුනේ. දෙදෙනාම සිත දියුණු කරලයි ඉන්නෙ. අන්තිම සිරුරු දරාගෙනයි ඉන්නෙ.”
සාදු! සාදු!! සාදු!!!
ආදිත්ත වර්ගය අවසන් විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn1_1-5-10/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M