809. පින්වත් දෙව්දුව, ඔබ නම් අහසත් පොළොවත් එළිය කරන ඉරක් හඳක් වගේ. හැබෑවටම බබලනවා. සක් දෙවිඳු ප්‍රධාන තව්තිසා දෙවියන් පරදවලා බබලන බ්‍රහ්මරාජයෙක් වගේ ඔබත් බබලනවා. සිරියාවෙනුත් සරීර සෝභාවෙනුත් යසසිනුත් තේජසිනුත් බබලනවා.
810. සුන්දර දෙව්දුව, නිල් මහනෙල් මල් මාලාවන් තමයි ඔබ පැළඳගෙන ඉන්නෙ. ඔබට දිළිසෙන රන්වන් සමක් තියෙනවා. ඒ සොඳුරු සිරුර අලංකාර වස්ත්‍රවලින් සරසාගෙන ඉන්නෙ. ඇත්තෙන්ම මට වන්දනා කරන ඔබ කවුද?
811. ඔබ කලින් ජාතියකදී මොන වගේ පුණ්‍යකර්මයක්ද කරගත්තෙ? හරි අගේට දන් පැන් පුදන්න ඇති නේද? එහෙම නැත්නම් ඉතා හොඳින් සිල් රැකගන්න ඇති. මේ යසස් ඇති සුගතියෙහි උපදින්න හේතු වුනේ මොන වගේ දෙයක්ද? පින්වත් දෙව්දුව, ඔය පුණ්‍ය විපාකය ලැබුණු පුණ්‍ය කර්මය ගැන අසන අපට පිළිතුරු දෙන්න.
812. ස්වාමීනි, දැන් මේ ගමේදිමයි ස්වාමීන් වහන්සේ නමක් අපේ නිවසට පිණ්ඩපාතෙ වැඩියේ. මගේ හිත පැහැදුනා. පුදුමාකාර ප්‍රීතියක් ඇති වුනා. ඉතින් මං උක් දණ්ඩක් රැගෙන මුඹ වහන්සේට පූජ කළා.
813. පස්සෙදි නැන්දා මගෙන් ඇහුවා “ලෙහෙලියේ, උක් දණ්ඩ කොහෙද තිබ්බේ” කියලා. මං එතකොට මෙහෙම කිව්වා. “මං ඒක වීසි කළේ නෑ. කෑවෙත් නෑ. ශාන්ත විහරණ ඇති ස්වාමීන් වහන්සේ නමකට මං ඒක පූජා කළා” කියල.
814. “අහා! එතකොට මේ ගෙදර ප්‍රධානියා තීද? එහෙම නැත්නම් මං ද?” කියල නැන්දා මට පරිභව කළා. එතැන තිබුණු ගල් කැටයක් අරගෙන මට පහර දුන්නා. මං මැරුනා. එයින් චුත වෙලා තමයි මං දෙව්දුවක් වුනේ.
815. මං කරගත්තෙ ඒ කුසල කර්මය විතරයි. තමන් කරගත්තු ඒ කුසල කර්මය නිසා මං දැන් සැප විඳිනවා. දෙවිවරුන් පිරිවරාගෙන හැසිරෙනවා. දිව්‍ය වූ පස්කම් සැපතින් සතුටු වෙනවා.
816. මං කරගත්තෙ ඒ කුසල කර්මය විතරයි. තමන් කර ගත්තු ඒ කුසල කර්මය නිසා මං දැන් සැප විඳිනවා. සක් දෙවිඳුන් තමයි මේ තව්තිසාව රකින්නෙ. ඒ දෙවිවරු තමයි මාව රකින්නෙ. එනිසා මං දිව්‍ය වූ පස්කම් සැපතින් සතුටු වෙනවා.
817. මෙබඳු වූ උක්දඬු පූජාවකින් වුනත් මහා පුණ්‍යවිපාක තියෙනවා. මේ ලැබුණු පුණ්‍යඵලය අල්ප දෙයක් නම් නෙවෙයි. මං දෙවිවරුන් පිරිවරාගෙන හැසිරෙනවා. දිව්‍ය වූ පස්කම් සැපතින් සතුටු වෙනවා.
818. මෙබඳු වූ උක්දඬු පූජාවකින් වුනත් මහා පුණ්‍යවිපාක තියෙනවා. මේ ලැබුණු පුණ්‍යඵලය අල්ප දෙයක් නම් නෙවෙයි. සක් දෙවිඳුන් තමයි මේ තව්තිසාව රකින්නෙ. ඒ දෙවිවරු තමයි මාව රකින්නෙ. එනිසා මං සක්දෙවිඳුන් වගේ සැපතින් සතුටු වෙනවා.
819. ස්වාමීනි, මහත් අනුකම්පා ඇති ඤාණවන්ත වූ මුඹ වහන්සේ ළඟට මං ආවා. වන්දනා කළා. සැප සනීප ඇහුවා. ඉතින් මම සිත පහදවාගෙන මහත් ප්‍රීතියකින් තමයි මුඹ වහන්සේට උක්දණ්ඩ පූජා කර ගත්තේ.
සාදු ! සාදු !! සාදු !!!
දසවෙනි උච්ඡු විමානය යි.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn3_1-4-10/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M