මහණෙනි, වැනැසුණු සිල් ඇති දුසිල් තැනැත්තා හට ‘පසුතැවිල්ල නැති බව’ යනු නැසී ගිය හේතු සම්පත් ඇති දෙයකි. පසුතැවිලි නැති බව නැති කල්හී ‘පසුතැවිලි නැති බව’ අහිමි වූ තැනැත්තාට ප්‍රමුදිත බව යනු නැසී ගිය හේතු සම්පත් ඇති දෙයකි. ප්‍රමුදිත බව නැති කල්හී ‘ප්‍රමුදිත බව’ අහිමි වූ තැනැත්තාට ප්‍රීතිය යනු නැසී ගිය හේතු සම්පත් ඇති දෙයකි. ප්‍රීතිය නැති කල්හී ‘ප්‍රීතිමත් බව’ අහිමි වූ තැනැත්තාට කය සංසිඳී සැහැල්ලු වීම යනු නැසී ගිය හේතු සම්පත් ඇති දෙයකි. කායික සැහැල්ලුව නැති කල්හී ‘කායික සැහැල්ලු බව’ අහිමි වූ තැනැත්තාට සැපය යනු නැසී ගිය හේතු සම්පත් ඇති දෙයකි. සැපය නැති කල්හී ‘සැපයෙන් තොරව’ වසන්නහුට සම්මා සමාධිය යනු නැසී ගිය හේතු සම්පත් ඇති දෙයකි. සම්මා සමාධිය නැති කල්හී ‘සම්මා සමාධියෙන් තොරව වසන්නහුට ඇත්ත ඇති සැටියෙන් මැ දන්නා නුවණ යනු නැසී ගිය හේතු සම්පත් ඇති දෙයකි. ඇත්ත ඇති සැටියෙන් මැ දන්නා නුවණ නැති කල්හී ඇත්ත ඇති සැටියෙන් ම දන්නා නුවණින් තොරව වසන්නහුට අවබෝධයෙන්ම එපා වීම යනු නැසී ගිය හේතු සම්පත් ඇති දෙයකි. අවබෝධයෙන් ම එපා වීම නැති කල්හී, එපා වීමකින් තොරව වසන්නහුට නොඇල්ම යනු නැසී ගිය හේතු සම්පත් ඇති දෙයකි. නොඇල්ම නැති කල්හී නොඇල්මෙන් තොරව වසන්නහුට තමා සදහට මැ නිදහස් වී ගිය බව දන්නා නුවණ යනු නැසී ගිය හේතු සම්පත් ඇති දෙයකි.
මහණෙනි, එය මෙබඳු දෙයකි. ගිලිහී ගිය අතුඉති ඇති, ගිලිහී ගිය කොළ ඇති රුකෙක් ඇත්තේ ය. ඒ රුකෙහි ගැලවුණු පොතු ත් වැඩී පිරිපුන් බවට නොයයි. ඇතුල් සිවිය ත්, එළය ත්, අරටුව ත් වැඩී පිරිපුන් බවට නොයයි. එසෙයින් මැ මහණෙනි, ගිලිහී ගිය සිල් ඇති දුසිල් තැනැත්තා හට පසුතැවිල්ල නැති බව යනු නැසී ගිය හේතු සම්පත් ඇති දෙයකි. පසුතැවිලි නැති බව නැති කල්හී, පසුතැවිලි නැති බව අහිමි වූ තැනැත්තා හට ප්‍රමුදිත බව යනු නැසී ගිය හේතු සම්පත් ඇති දෙයකි. ….(පෙ)…. විමුක්ති ඥාන දර්ශනය යනු නැසී ගිය හේතු සම්පත් ඇති දෙයකි.
මහණෙනි, සීලයෙන් යුක්ත වූ සිල්වත් තැනැත්තා හට ‘පසුතැවිල්ල නැති බව’ යනු හේතු සම්පත් ඇති දෙයකි. පසුතැවිලි නැති බව ඇති කල්හී ‘පසුතැවිලි නැති බවෙන් යුක්ත තැනැත්තා හට ප්‍රමුදිත බව යනු හේතු සම්පත් ඇති දෙයකි. ප්‍රමුදිත බව ඇති කල්හී ‘ප්‍රමුදිත බවින් යුතු තැනැත්තා හට ප්‍රීතිය යනු හේතු සම්පත් ඇති දෙයකි. ප්‍රීතිය ඇති කල්හී ‘ප්‍රීතිමත් බවින් යුතු තැනැත්තා හට කය සංසිඳී සැහැල්ලු වීම යනු හේතු සම්පත් ඇති දෙයකි. කායික සැහැල්ලුව ඇති කල්හී ‘කායික සැහැල්ලුවෙන් යුතු තැනැත්තා හට සැපය යනු හේතු සම්පත් ඇති දෙයකි. සැපය ඇති කල්හී සැප සේ වසන්නහුට සම්මා සමාධිය යනු හේතු සම්පත් ඇති දෙයකි. සම්මා සමාධිය ඇති කල්හී ‘සම්මා සමාධියෙන් යුක්ත ව වසන්නහුට ඇත්ත ඇති සැටියෙන් මැ දන්නා නුවණ යනු හේතු සම්පත් ඇති දෙයකි. ඇත්ත ඇති සැටියෙන් මැ දන්නා නුවණ ඇති කල්හී ඇත්ත ඇති සැටියෙන් මැ දන්නා නුවණින් යුක්ත ව වසන්නහුට අවබෝධයෙන්ම එපා වීම යනු හේතු සම්පත් ඇති දෙයකි. අවබෝධයෙන් ම එපා වීම ඇති කල්හී, අවබෝධයෙන් එපාවීමෙන් යුක්තව වසන්නහුට නොඇල්මට පත්වන බව යනු හේතු සම්පත් ඇති දෙයකි. නොඇල්මට පත්වීම ඇති කල්හී, නොඇල්මෙන් යුක්ත ව වසන්නහුට තමා සදහට මැ නිදහස් වී ගිය බව දන්නා නුවණ යනු හේතු සම්පත් ඇති දෙයකි.
මහණෙනි, එය මෙබඳු දෙයකි. මැනැවින් වැඩී ගිය අතුඉති ඇති, මැනැවින් වැඩී ගිය කොළ ඇති රුකෙක් ඇත්තේ ය. ඒ රුකෙහි පිට පොතු ත් වැඩී පිරිපුන් බවට යයි. ඇතුල් සිවිය ත්, එළය ත්, අරටුව ත් වැඩී පිරිපුන් බවට යයි. එසෙයින් මැ මහණෙනි, සීලයෙන් යුතු සිල්වත් තැනැත්තා හට පසුතැවිල්ල නැති බව යනු හේතු සම්පත් ඇති දෙයකි. පසුතැවිලි නැති බව ඇති කල්හී, පසුතැවිලි නැති තැනැත්තා හට ප්‍රමුදිත බව යනු හේතු සම්පත් ඇති දෙයකි. ….(පෙ)…. විමුක්ති ඥාන දර්ශනය යනු යනු හේතු සම්පත් ඇති දෙයකි.
සාදු! සාදු!! සාදු!!!
පඨම උපනිස සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an6_11-1-3/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M