මහණෙනි, යම් උපක්ලේශයකින් කිළුටු වූ විට චන්ද්‍ර සූර්ය දෙදෙනා නොබබලත් නම්, එළිය නොදෙත් නම්, රැස් නොවිහිදුවත් නම් චන්ද්‍ර සූර්ය දෙදෙනාට මේ උපක්ලේශයෝ සතරකි. ඒ කවර සතරක් ද යත්;
1. මහණෙනි, යම් උපක්ලේශයකින් කිළුටු වූ විට චන්ද්‍ර සූර්ය දෙදෙනා නොබබලත් නම්, එළිය නොදෙත් නම්, රැස් නොවිහිදුවත් නම් චන්ද්‍ර සූර්ය දෙදෙනාගේ ඒ උපක්ලේශය වළාකුළු ය.
2. මහණෙනි, යම් උපක්ලේශයකින් කිළුටු වූ විට චන්ද්‍ර සූර්ය දෙදෙනා නොබබලත් නම්, එළිය නොදෙත් නම්, රැස් නොවිහිදුවත් නම් චන්ද්‍ර සූර්ය දෙදෙනාගේ ඒ උපක්ලේශය මීදුම ය.
3. මහණෙනි, යම් උපක්ලේශයකින් කිළුටු වූ විට චන්ද්‍ර සූර්ය දෙදෙනා නොබබලත් නම්, එළිය නොදෙත් නම්, රැස් නොවිහිදුවත් නම් චන්ද්‍ර සූර්ය දෙදෙනාගේ ඒ උපක්ලේශය දුහුවිලි හා දුම් ය.
4. මහණෙනි, යම් උපක්ලේශයකින් කිළුටු වූ විට චන්ද්‍ර සූර්ය දෙදෙනා නොබබලත් නම්, එළිය නොදෙත් නම්, රැස් නොවිහිදුවත් නම් චන්ද්‍ර සූර්ය දෙදෙනාගේ ඒ උපක්ලේශය රාහු අසුරේන්ද්‍රයා ය.
මහණෙනි, යම් උපක්ලේශයකින් කිළුටු වූ විට චන්ද්‍ර සූර්ය දෙදෙනා නොබබලත් නම්, එළිය නොදෙත් නම්, රැස් නොවිහිදුවත් නම් චන්ද්‍ර සූර්ය දෙදෙනාට මේ ඒ උපක්ලේශයෝ සතරයි.
එසෙයින් ම මහණෙනි, යම් උපක්ලේශයකින් කිළුටු වූ විට ඇතැම් ශ්‍රමණ බ්‍රාහ්මණයෝ නොබබලත් නම්, එළිය නොදෙත් නම්, රැස් නොවිහිදුවත් නම් ශ්‍රමණ බ්‍රාහ්මණයන් හට මේ උපක්ලේශයෝ සතරකි. ඒ කවර සතරක් ද යත්;
1. මහණෙනි, ඇතැම් ශ්‍රමණබ්‍රාහ්මණයෝ සුරාමේරය බොති. සුරාමේරය බීමෙන් නොවැළකී සිටිති. මහණෙනි, යම් උපක්ලේශයකින් කිළුටු වූ විට ඇතැම් ශ්‍රමණ බ්‍රාහ්මණයෝ නොබබලත් නම්, එළිය නොදෙත් නම්, රැස් නොවිහිදුවත් නම් ශ්‍රමණ බ්‍රාහ්මණයන් හට මේ පළමු උපක්ලේශය යි.
2. මහණෙනි, ඇතැම් ශ්‍රමණබ්‍රාහ්මණයෝ මෛථූන සේවනයෙහි යෙදෙති. මෛථූන සේවනයෙන් නොවැළකී සිටිති. මහණෙනි, යම් උපක්ලේශයකින් කිළුටු වූ විට ඇතැම් ශ්‍රමණ බ්‍රාහ්මණයෝ නොබබලත් නම්, එළිය නොදෙත් නම්, රැස් නොවිහිදුවත් නම් ශ්‍රමණ බ්‍රාහ්මණයන් හට මේ දෙවෙනි උපක්ලේශය යි.
3. මහණෙනි, ඇතැම් ශ්‍රමණබ්‍රාහ්මණයෝ රන් රිදී මිල මුදල් පරිහරණය කරති. රන් රිදී මිල මුදල් ගැනීමෙන් නොවැළකී සිටිති. මහණෙනි, යම් උපක්ලේශයකින් කිළුටු වූ විට ඇතැම් ශ්‍රමණ බ්‍රාහ්මණයෝ නොබබලත් නම්, එළිය නොදෙත් නම්, රැස් නොවිහිදුවත් නම් ශ්‍රමණ බ්‍රාහ්මණයන් හට මේ තුන්වෙනි උපක්ලේශය යි.
4. මහණෙනි, ඇතැම් ශ්‍රමණබ්‍රාහ්මණයෝ මිථ්‍යා ආජීවයෙන් ජීවත් වෙති. මිථ්‍යා ආජීවයෙන් නොවැළකී සිටිති. මහණෙනි, යම් උපක්ලේශයකින් කිළුටු වූ විට ඇතැම් ශ්‍රමණ බ්‍රාහ්මණයෝ නොබබලත් නම්, එළිය නොදෙත් නම්, රැස් නොවිහිදුවත් නම් ශ්‍රමණ බ්‍රාහ්මණයන් හට මේ සිව්වෙනි උපක්ලේශය යි.
මහණෙනි, යම් උපක්ලේශයකින් කිළුටු වූ විට ඇතැම් ශ්‍රමණ බ්‍රාහ්මණයෝ නොබබලත් නම්, එළිය නොදෙත් නම්, රැස් නොවිහිදුවත් නම් ශ්‍රමණ බ්‍රාහ්මණයන් හට මේ ඒ උපක්ලේශයෝ සතරයි.
(ගාථා)
1. රාග ද්වේෂ විසින් ඇතැම් ශ්‍රමණ බ්‍රාහ්මණයෝ ඔබමොබ ඇදගෙන යන ලද්දාහ. ප්‍රිය ස්වරූප ඇති අරමුණු සතුටින් පිළිගන්නා වූ පුරුෂයෝ අවිද්‍යාවෙන් වැසී ගියාහු ය.
2. ඒ අනුවණයෝ රහමෙර බොති. මෛථූන සේවනයෙහි යෙදෙති. රන් රිදී මිල මුදල් ඉවසති.
3. ඇතැම් ශ්‍රමණ බ්‍රාහ්මණයෝ මිථ්‍යා ආජීවයෙන් ජීවත් වෙති. ආදිච්චබන්ධු වූ බුදුරජාණන් වහන්සේ විසින් මේවා උපක්ලේශයන් යැයි වදාරණ ලද්දේ ය.
4. යම් උපක්ලේශයකින් කිලිටි වූ විට ඇතැම් ශ්‍රමණබ්‍රාහ්මණයෝ නොබබලති. නොදිලිසෙති. අස්ථිර පැවතුම් ඇති ඔවුහු කෙලෙස් රජස් ඇත්තාහු ය.
5. අවිද්‍යා අන්ධකාරයෙන් දෑස් වැසී ගිය තෘෂ්ණාවට දාස වූ මාරයාගේ රැහැනින් බැඳී ගිය ඔවුහු ඝෝර වූ සොහොන වඩති. නැවත නැවත භවයට පැමිණෙති.
සාදු! සාදු!! සාදු!!!
උපක්කිලේස සූත්‍රය නිමා විය.
පස්වෙනි රෝහිතස්ස වර්ගය අවසන් විය.
එහි පිළිවෙල උද්දානයයි :
සමාධි සූත්‍රය, ප්‍රශ්න සූත්‍රය, ක්‍රෝධ සූත්‍ර දෙක, රෝහිතස්ස සූත්‍ර දෙක, සුවිදූර සූත්‍රය, විශාඛ සූත්‍රය, විපල්ලාස සූත්‍රය සහ උපක්කිලේස සූත්‍රය වශයෙන් මෙහි සූත්‍ර දශයකි.
පළමු පණ්ණාසකය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an2_4-1-5-10/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M